administrator

Уламжлалт мэдлэг гэж юу вэ?


2018/10/01

Үеэс үед бий болж өвлөгдөн уламжлагдаж ирсэн, генетик нөөцийн онцлог шинж чанар, түүнийг ашиглах арга ухаан, мэдлэг, ур чадварыг генетик нөөцтэй холбоотой уламжлалт мэдлэг гэнэ.

Уламжлалт мэдлэг нь хэсэг бүлэг хүмүүсийн соёлын болон оюун санааны онцлогийн нэг хэсэг төдийгүй уламжлалт мэдлэгийнхээ ачаар хүн төрөлхтөн өнөөг хүртэл оршин тогтнож иржээ.

Уламжлалт мэдлэг нь генетик нөөцтэй салшгүй холбоотой бөгөөд генетик нөөцийг агуулдаг ургамал, амьтан, мөөг бичил биетнийг нутгийн иргэд хэдэн зууны туршид хэрэглэж, ашиглаж, хамгаалсаар ирсэн байна

Генетик нөөцтэй холбоотой уламжлалт мэдлэг бол Монгол Улсын БИЕТ БУС СОЁЛЫН ӨВ бөгөөд Эрдэс баялагтай адил эдийн засгийн үнэ цэнэ бүхий  материаллаг баялаг бүтээх чадвартай НӨӨЦ ЮМ.

Генетик нөөцтэй холбоотой уламжлалт мэдлэгийг хэрхэн ашигладаг вэ?

Дэлхий даяар генетик нөөц болон түүнтэй холбоотой уламжлалт мэдлэгт тулгуурлан шинэ эм, хүнс, гоо сайхан, хөдөө аж ахуйн бүтээгдэхүүн үйлдвэрлэж байна.

Тухайлбал хавдрын эмчилгээнд хэрэглэгдэж буй батлагдсан нийт эмийн 60 орчим хувь нь амьтан, ургамал, бичил биетэн, байгалийн бусад нөөцөөс гаралтай байна.

Монгол Улсын хувьд хөдөө аж ахуй, хүнс биотехнологи, эрүүл мэндийн салбар дахь ихэнх шинэ бүтээл нь уламжлалт мэдлэгт  тулгуурласан байдаг.

Шинэсэрхүү бударганыг нутгийн иргэд доройтсон малыг тэнхрүүлэхэд ашигладаг байсан уламжлалт мэдлэгт суурилан Монос фарм компани Салимон дархлаа дэмжих бэлдмэлийг бүтээжээ.

Генетик нөөцтэй холбоотой уламжлалт мэдлэгийн эзэмшигч хэн бэ?

Уламжлалт мэдлэг бол Монголын ард түмний үнэт зүйл, хамтын өв билээ.

Уламжлалт мэдлэгийг ихэнхдээ хамтаараа үүсгэж, хэрэглэж, хадгалж ирсэн байдаг учраас хэсэг бүлэг хүмүүсийн ӨВ ХӨРӨНГӨ юм.